Pétur Óskar

Pétur Óskar útskrifaðist frá leiklistardeild Cours Florent í París vorið 2014. Á meðan á náminu stóð var Pétur valinn til að taka þátt í vinnustofu við hið virta leikhús Schaubühne í Berlín þar sem hann setti upp verk eftir Falk Richter og vann í nánu samstarfi með leikstjórum eins og Thomasi Ostermeier og Grazynu Dytlag. Pétur talar þýsku reiprennandi og fer hann reglulega til Berlínar í verkefni þar. Einnig talar hann frönsku reiprennandi og fer sömuleiðis í sömu erindagjörðum til Frakklands nokkrum sinnum á ári. Pétur hefur leikið í nokkrum frönskum kvikmyndum sem og fjölda leikrita. Árið 2015 lá leiðin til Íslands þar sem Pétur lék eitt af aðalhlutverkunum í kvikmyndinni Grimmd. Einnig lék hann í Andið Eðlilega, Capitani(lúxembúrgísk sjónvarpssería sem hlaut mikið lof). Hvað þekktastur er Pétur fyrir leik sinn sem Tryggvi lögreglumaður í Ófærð 2. Nú síðast lék hann í sjónvarpsþáttunum Verbúð á vegum Vesturports sem og í leikritinu Polishing Iceland, í leikstjórn Pálínu Jónsdóttur, sem hluti af Reykjavík International Ensemble. Pétur hefur einnig leikið í fjölda alþjóðlegra auglýsinga fyrir þekkt merki eins og Levi’s og Swarovski ásamt fjöld innlendra auglýsinga eins og Smáralind og Sjóvá.

Pétur er ekki við eina fjölina felldur og gengur undir nafninu Oscar Leone þegar kemur að tónlist. Tónlist hans mætti líkja við Arcade Fire og Edward Sharpe; hugljúf gítartónlist til að grilla við. Einskonar indie-rock með folk/country ívafi.  Pétur hefur gefið út fjögur lög sem öll hafa skorað hátt á hverskyns vinsældarlistum og setið þar í margar vikur í röð ásamt því að fá miklar spilanir í útvarpi. Fyrir myndband sitt við fyrsta lagið sitt Superstar var hann tilfnefndur til íslensku tónlistarverðlaunanna sem er sjaldgæft miðað við fyrsta lag. Pétur heldur áfram að semja og finnst gott að skipta þessu jafnt á milli.