Steiney Skúladóttir

Steiney Skúladóttir er fædd í Reykjavík 1990. Hún er svo gott sem alin upp inní leikhúsum landsins, eigandi foreldra sem eru leikarar. Hún sýndi snemma áhuga á að feta sömu leið og sótti hin ýmsu leiklistarnámskeið og lék í kvikmyndum og sjónvarpsþáttum frá unga aldri. 

Á tímabili setti Steiney leikaradrauminn á hilluna en árið 2014 tók hún við Edduverðlaunum móður sinnar sem togaði aftur í hana. Nokkrum mánuðum seinna var hún gengin til liðs við Hraðfréttir sem virkilega óþægilega menningarfréttakona. Á svipuðum tíma byrjaði hún í rappsveitinni Reykjavíkurdætrum og á námskeiðum í spunafræðum. Í Reykjavíkurdætrum lærði hún að standa á sviði fyrir framan þúsundir manna, ná að fanga þau og vekja upp allskonar tilfinningar. Spuninn eða Improvið var eins og týnda púslið í lífi Steineyjar því þar gat hún verið leikkona, höfundur og grínari allt á sama tíma.
Steiney er enn að grúska í öllum þessum hlutum nema í stað Hraðfrétta hafa þættirnir Kanarí tekið við þar sem hún skrifar og leikur sketsa. Hún sýnir spuna alla miðvikudaga í Þjóðleikhúskjallaranum með Improv Ísland og Reykjavíkurdætur halda stöðugt áfram að kanna ótroðnarslóðir. 

Að telja upp öll þau hlutverk sem Steiney hefur brugðið sér í með Kanarí og Improv Ísland væri ógjörningur og eru þau jafn ólík og þau eru mörg. 
Steiney hefur gert sína eigin sjónvarpsþætti, Framapot og Heilabrot, ásamt Sigurlaugu Söru. Hún hefur kynnt í beinum útsendingum í sjónvarpi eins og Söngkeppni framhaldsskólanna, Skrekk og Samfés.